Кукмара районы имамнарының чираттагы җыены

Кукмарада мөхтәсибәтнең чираттагы җыелышы үтте. Аны имам-мөхтәсиб вазыйфасын вакытлыча башкаручы Рәдиф хәзрәт Тимергалиев алып барды. Чара вакытында мөхтәсибәт тарафыннан ай дәвамында башкарылган эшләргә нәтиҗә ясадылар һәм киләчәккә максатларны барладылар. Якынлашып килүче Мәүлид аена әзерлек алып бару һәм һәр мәхәлләдә бу уңайдан кичәләр оештыру хакында килештеләр. 

Хәзрәтләр каршында районның Аксакаллар шурасы рәисе Мөнир хәзрәт һәм Кукмара мәдрәсәсе директор Ришат хәзрәт Курамшин чыгыш ясады. Чара ахырында нәзарәт чыгарган  дини йолалар уздыру турында нигезләмә буенча дәрес тә оештырылды.